იაპონიაში, ლიფტებში საპირფარეშოები დაამონტაჟეს

იაპონიამ ზოგიერთ ლიფტში საგანგებო საპირფარეშოების დაყენებით, სეისმური მზადყოფნისკენ კიდევ ერთი ნაბიჯი გადადგა. ეს ინოვაცია დაეხმარება იმ ადამიანებს, რომლებიც შესაძლოა ლიფტში ჩაიკეტონ ელექტროენერგიის გათიშვისა და ლიფტის მწყობრიდან გამოსვლის დროს, წერს Dimsum Daily.

სპეციალური საპირფარეშოები, რომლებიც ლიფტებშია ინტეგრირებული, აღჭურვილია ყველა აუცილებელი საშუალებით, როგორიცაა წყალი, ტუალეტის ქაღალდი, დეოდორანტი და საგანგებო განათება.

თუმცა, ზოგიერთი კრიტიკოსი მიიჩნევს, რომ ყურადღება უნდა გამახვილდეს თავად ლიფტების უსაფრთხოების გაუმჯობესებაზე და არა მხოლოდ კრიტიკული სცენარებისთვის მზადყოფნაზე.

მხარდამჭერები კი ამ გადაწყვეტილებას გონივრულ ინოვაციად აფასებენ, განსაკუთრებით ისეთ გარემოში, როგორიცაა სამედიცინო დაწესებულებები, სადაც ხანდაზმულებს სპეციალური საჭიროებები ჰქონდეთ.

არ არის გამორიცხული, რომ ეს უჩვეულო სიახლე მალე გახდეს ლიფტების სტანდარტული მახასიათებელი, რაც კიდევ ერთხელ წარმოაჩენს ქვეყნის ერთგულებას ინოვაციური და პრევენციული გადაწყვეტილებების მიმართ.